गृहराज्यमंत्र्यांच्या नावाचा गैरवापर?'पीए' असल्याचे सांगून ५ हजार घेतल्याचा आरोप!

रत्नागिरी : राज्याचे गृहराज्यमंत्री योगेश कदम यांच्या नावाचा गैरवापर करून आर्थिक फसवणूक केल्याचा धक्कादायक प्रकार रत्नागिरी जिल्ह्यातील खेड तालुक्यात उघडकीस आला आहे. आपण मंत्री योगेश कदम यांचा स्वीय सहाय्यक (PA) असल्याचे सांगत एका सामाजिक कार्यकर्त्याकडून ५ हजार रुपये उकळल्याचा आरोप रविराज चिखले याच्यावर करण्यात आला आहे. याप्रकरणी खेड पोलीस ठाण्यात फसवणुकीचा गुन्हा दाखल झाला असून पोलीस अधिक तपास करत आहेत.

मंत्र्यांची भेट घडवून देण्याच्या नावाखाली पैसे घेतल्याचा आरोप

या प्रकरणात विद्याधर दत्ताराम साळुंखे (वय ५६, मूळ रा. बोरगाव-साळुंखेवाडी, ता. चिपळूण, सध्या मुंबई) यांनी पोलिसांत फिर्याद दिली आहे.

चिपळूण तालुक्यात सुरू असलेल्या कथित अनधिकृत चिरा-दगड खाणींमुळे शासनाचा कोट्यवधी रुपयांचा महसूल बुडत असल्याचा साळुंखे यांचा आरोप होता. ही बाब गृहराज्यमंत्री योगेश कदम यांच्या निदर्शनास आणून देण्यासाठी ते प्रयत्न करत होते.

याचदरम्यान रविराज चिखले याने आपण मंत्री योगेश कदम यांचा स्वीय सहाय्यक असल्याचे सांगून त्यांच्याशी संपर्क साधल्याचा आरोप आहे. मंत्र्यांची प्रत्यक्ष भेट घडवून देण्यासह संबंधित प्रश्न मार्गी लावण्याचे आश्वासन चिखले याने दिल्याचे फिर्यादीत नमूद आहे.

५ हजार रुपये घेतले; मात्र भेटही नाही अन् कामही नाही!

फिर्यादीनुसार, १७ सप्टेंबर २०२६ रोजी खेड येथे रविराज चिखले याने विद्याधर साळुंखे यांच्याकडून ५ हजार रुपये रोख स्वीकारले. मात्र, पैसे देऊनही मंत्री योगेश कदम यांची भेट घडवून देण्यात आली नाही. तसेच आश्वासन दिलेले कामही झाले नाही.

वारंवार प्रयत्न करूनही अपेक्षित प्रतिसाद न मिळाल्याने आपली फसवणूक झाल्याचे साळुंखे यांच्या लक्षात आले. त्यानंतर त्यांनी खेड पोलीस ठाण्यात धाव घेत तक्रार दाखल केली.

खेड पोलीस ठाण्यात गुन्हा दाखल

या प्रकरणी १८ ऑक्टोबर २०२६ रोजी सायंकाळी ७ वाजून २९ मिनिटांनी खेड पोलीस ठाण्यात गुन्हा क्रमांक ३४२/२०२६ नोंदवण्यात आला आहे.

रविराज चिखले याच्याविरोधात भारतीय न्याय संहिता (BNS) २०२३ मधील कलम ३१८(२), ३१८(४) आणि ३१९(२) अन्वये गुन्हा दाखल करण्यात आला आहे.

मंत्र्यांच्या नावाचा गैरवापर? तपासातून सत्य समोर येणार

गृहराज्यमंत्र्यांचा स्वीय सहाय्यक असल्याचे भासवून पैसे घेतल्याच्या या आरोपांमुळे खेड परिसरात चर्चेला उधाण आले आहे. संबंधित व्यक्तीने खरोखरच मंत्र्यांच्या नावाचा गैरवापर केला का, याचा तपास पोलिसांकडून सुरू आहे.

दरम्यान, या प्रकरणातील आरोप अद्याप न्यायालयात सिद्ध झालेले नाहीत.