नववीतील मुलीची धारदार शस्त्राने हत्या! माणगावात संतापाचा उद्रेक; महिलांचा मोर्चा, फाशीच्या शिक्षेची मागणी

कोल्हापूर : कोल्हापूर जिल्ह्यातील हातकणंगले तालुक्यातील माणगाव येथे घडलेल्या एका संतापजनक घटनेने संपूर्ण परिसर हादरला आहे. अवघ्या १५ वर्षांच्या, नववीत शिकणाऱ्या अल्पवयीन मुलीची मंदिर परिसरात धारदार शस्त्राने वार करून निर्घृण हत्या करण्यात आली. शनिवारी (१७ ऑक्टोबर) रात्री सुमारे नऊ वाजण्याच्या सुमारास घडलेल्या या घटनेनंतर गावात तीव्र संताप व्यक्त होत आहे. संशयिताला तातडीने अटक करून कठोर शिक्षा देण्याच्या मागणीसाठी ग्रामस्थांनी मोर्चा काढला.

मंदिर परिसरात मुलीवर जीवघेणा हल्ला

मिळालेल्या माहितीनुसार, माणगाव येथील सांस्कृतिक भवनासमोरील मंदिर परिसरात ही धक्कादायक घटना घडली. संबंधित मुलगी नववीच्या वर्गात शिक्षण घेत होती. शनिवारी रात्री मंदिर परिसरात असताना संशयिताने तिच्या गळ्यावर आणि दंडावर धारदार शस्त्राने वार केले.

या हल्ल्यात मुलगी गंभीर जखमी झाली. तिला तातडीने इचलकरंजी येथील इंदिरा गांधी मेमोरियल (आयजीएम) रुग्णालयात दाखल करण्यात आले. मात्र, डॉक्टरांनी तपासणीनंतर तिला मृत घोषित केले. या घटनेमुळे माणगावमध्ये भीतीचे आणि संतापाचे वातावरण निर्माण झाले आहे.

'आरोपीला गावातच फाशी द्या'; ग्रामस्थांचा संताप अनावर

अल्पवयीन मुलीच्या हत्येनंतर माणगावमधील ग्रामस्थांनी संताप व्यक्त करत मोर्चा काढला. या मोर्चामध्ये महिलांनी मोठ्या संख्येने सहभाग घेतला.

आरोपीला माणगावातच फाशीची शिक्षा द्यावी, अशी मागणी संतप्त ग्रामस्थांनी पोलिसांसमोर केली. या प्रकरणाचा तपास तातडीने पूर्ण करून दोषीला कठोर शिक्षा व्हावी, अशी भूमिका ग्रामस्थांनी मांडली.

दरम्यान, या हत्येचा खटला जलदगती न्यायालयात चालवावा, अशी मागणीही मोर्चात सहभागी महिलांनी केली. एका निष्पाप मुलीचा अशा प्रकारे जीव गेल्याने संपूर्ण गावातून तीव्र संताप व्यक्त होत आहे.

फॉरेन्सिक आणि श्वान पथकाच्या मदतीने तपास

घटनेची माहिती मिळताच हातकणंगले पोलिसांनी घटनास्थळी धाव घेत तपास सुरू केला. घटनास्थळावरील पुरावे गोळा करण्यासाठी फॉरेन्सिक पथकाला पाचारण करण्यात आले. संशयिताचा माग काढण्यासाठी श्वान पथकाचीही मदत घेण्यात आली.

पोलिसांकडून संशयिताचा शोध घेण्यासाठी शोधमोहीम राबवण्यात येत आहे. हत्येमागील नेमके कारण अद्याप स्पष्ट झालेले नाही.

हत्येमागील कारण काय? पोलिसांच्या तपासाकडे लक्ष

भरवस्तीत असलेल्या मंदिर परिसरात एका अल्पवयीन मुलीची हत्या झाल्याने नागरिकांच्या सुरक्षेचा प्रश्न पुन्हा ऐरणीवर आला आहे. हल्लेखोर कोण होता? त्याने मुलीवर हल्ला का केला? या प्रश्नांची उत्तरे पोलिसांच्या तपासातून समोर येणे अपेक्षित आहे.

दरम्यान, या प्रकरणातील संशयिताला लवकरात लवकर पकडून कठोर कायदेशीर कारवाई करावी, अशी मागणी ग्रामस्थांकडून होत आहे.