‘शिवसैनिकांना हात लावाल तर महाराष्ट्र बंद!’ आदित्य ठाकरेंचा पोलिसांना थेट इशारा

मुंबई : मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी कॉकरोच जनता पार्टीकडून (CJP) सुरू असलेल्या आंदोलनाचे तीव्र पडसाद मुंबईत उमटले आहेत. शिवाजी पार्क परिसरात आंदोलनासाठी जमलेल्या कार्यकर्त्यांना पोलिसांनी ताब्यात घेतल्याने मोठा तणाव निर्माण झाला. या आंदोलनात शिवसेना (उद्धव बाळासाहेब ठाकरे) आणि महाराष्ट्र नवनिर्माण सेनेनेही आक्रमक भूमिका घेतली.

शिवसेना भवनासमोर आदित्य ठाकरेंचा ठिय्या!

शिवसेना भवन परिसरात पोलिसांनी शिवसैनिकांना ताब्यात घेण्याचा प्रयत्न केल्याने वातावरण चिघळले. यावेळी आदित्य ठाकरे आणि तेजस ठाकरे घटनास्थळी दाखल झाले. शिवसैनिकांवरील कारवाईला विरोध करत आदित्य ठाकरे यांनी रस्त्यावरच ठिय्या मांडला.

‘शिवसैनिकांना हात लावू नका, अन्यथा महाराष्ट्र बंद पाडू,’ असा थेट इशारा आदित्य ठाकरे यांनी पोलिसांना दिला. यावेळी आमदार अनिल परब यांनीही पोलिसांच्या कारवाईवर तीव्र नाराजी व्यक्त केली.

पोलीस व्हॅन अडवली; १० ते १५ मिनिटे तणाव!

मिळालेल्या माहितीनुसार, आदित्य ठाकरे यांनी पोलीस व्हॅनच्या दरवाजावर चढून वाहन अडवले. शिवसैनिकांनीही पोलिसांच्या वाहनाला घेराव घातला. त्यामुळे परिसरात सुमारे १० ते १५ मिनिटे तणावपूर्ण परिस्थिती निर्माण झाली. अखेर पोलिसांनी ताब्यात घेतलेल्या शिवसैनिकांची सुटका केल्याचे वृत्त आहे.

अमित ठाकरेही आक्रमक; मनसैनिकांचा पोलिसांना विरोध!

दुसरीकडे, CJP आंदोलकांवरील पोलिसांच्या कारवाईविरोधात मनसे नेते अमित ठाकरे यांनीही आक्रमक भूमिका घेतली. आंदोलन करण्याचा अधिकार सर्वांना असताना आंदोलकांना ताब्यात का घेतले जात आहे, असा सवाल त्यांनी पोलिसांना केला.

दरम्यान, मनसे नेते संदीप देशपांडे यांच्यासह काही पदाधिकाऱ्यांना पोलिसांनी ताब्यात घेतल्याने मनसैनिक संतप्त झाले. त्यांनी पोलीस वाहन अडवत कारवाईला विरोध केला.

CJP आंदोलनामुळे मुंबईत राजकीय संघर्ष तीव्र!

दिल्लीतील CJP आंदोलनाच्या समर्थनार्थ मुंबईतही निदर्शने सुरू आहेत. मुख्य निवडणूक आयुक्त ज्ञानेश कुमार यांच्या राजीनाम्याची मागणी आंदोलकांकडून केली जात आहे. या आंदोलनाला ठाकरे गट आणि मनसेने पाठिंबा दिल्याने राजकीय संघर्ष अधिक तीव्र झाला आहे. पोलिसांच्या कारवाईवरून विरोधकांनी भाजपवर निशाणा साधला असून आंदोलनाच्या अधिकारावरून नवा वाद निर्माण झाला आहे.